Vannamei Pond Preparation Techniques

Vannamei Pond Preparation:రొయ్యల సాగు చేసే రైతులు రొయ్యల పెంపకంలో చాలా రకాల పద్ధతులను అనుసరించి చెరువులను పిల్ల వేయడానికి అనుగుణంగా ప్రిపేర్ చేసుకుంటూ ఉంటారు. అయితే ట్యాంక్ ప్రిపేర్ చేసేటప్పుడు మనం తీసుకోవాల్సిన కొన్ని ముఖ్యమైన సూచనలను తెలుసుకోవాలి.

చెరువు అడుగుభాగం రెడీ చేసే విధానం

మనము ఎంచుకున్న చెరువును సుమారు రెండు మూడు వారాలు ఎండబెట్టుకోవాలి. ఎండిన తర్వాత 5 నుంచి10 సెంటీమీటర్లు లేయర్ లాగా మట్టిని తొలగించుకోవాలి. ఇలా చేయడం వల్ల ముందు క్రాఫ్ లో వచ్చిన వైరస్లు, బ్యాక్టీరియాలను అరికట్టవచ్చు అదేవిధంగా రొయ్యల వ్యర్ధాలను కూడా తొలగించవచ్చు. తర్వాత భూమిలోని పీహెచ్ , మినరల్స్, తేమశాతం ఎంత ఉందో పరీక్ష చేయించుకోవాలి. సాధారణంగా మట్టి యొక్క పీహెచ్ స్థాయి 7.5 నుండి 8.5 ఉండాలి . నీరు నింపే ముందు ఎకరాకు 100 కేజీల అగ్రికల్చర్ సున్నం అడుగు భాగాన జల్లాలి. తరువాత చెరువులో నీటిని పెట్టుకోవాలి, నీరు పెట్టుకునేటప్పుడు పూర్తిగా 1.2 మీటర్లు ( 6 అడుగుల వరకు నీటిని పెట్టుకోవాలి).

భద్రత

భద్రత చర్యలలో భాగంగా అనగా పాండు చుట్టూత నెట్ ఫెన్సింగ్ మరియు బర్డ్ ఫెన్సింగ్ ఏర్పాటు చేసుకోవాలి.

చెరువులో నీరు నింపిన తర్వాత చేయవలసిన పనులు

ఉదయం పూట ఎకరానికి 50 కేజీల చొప్పున బ్లీచింగ్ ను చల్లుకోవాలి. ఈ విధంగా చేయడం ద్వారా నీటిలో ఉండేటువంటి అనవసరమైన లార్వాలు ,బ్యాక్టీరియాలు మరియు ఫంగల్ వంటివి చనిపోతాయి.

రెండు రోజుల తర్వాత దాన్ని ఫ్యాన్ సెట్స్ ద్వారా తిప్పి డి క్లోరినేషన్ చేసుకోవాలి, తర్వాత ప్రో బయోటెక్ మీడియా అనేది జల్లుకోవాలి. ఒక ఎకరాకు తౌడు ఒక పది నుంచి 20 కేజీలు, ఈస్ట్  100 గ్రాముల నుంచి పావు కేజీ వరకు, బెల్లం నాలుగు కేజీలు ఈ మిశ్రమాన్ని కలిపి ఒక రాత్రంతా  దాన్ని బాగా పులియబెట్టిన తర్వాత దాన్ని మనం చెరువులు జల్లు కోవాలి. జల్లు కున్న రెండు రోజుల తర్వాత మనము నీటిలో కరిగే ప్రో బయోటెక్ నీ తెచ్చుకుని చెరువులో చల్లుకోవాలి. మనం ఇంకో రెండు రోజుల తర్వాత దాంట్లో మినరల్ మిక్సర్ చల్లుకోవాలి. అదే విధముగా తక్కువ ఉప్పు శాతం ఉంటే పొటాస్, మెగ్నీషియంసల్ఫేట్ ను కూడా జల్లుకోవాలి. మరొక రెండు రోజుల తర్వాత మరొకసారి ప్రో బయోటెక్ ను చల్లుకోవాలి తర్వాత మనం ఒకసారి నీటిని పరీక్ష చేయించుకోవాలి.

వాటర్ టెస్ట్ రిపోర్ట్ ఈ విధంగా ఉండాలి

పీహెచ్ 7.5-8.5 మధ్య ఉండాలి.

ఆక్సిజన్ 5ppm కంటే ఎక్కువ ఉండాలి.

ఆల్కలీనిటి 100ppm కంటే ఎక్కువ ఉండాలి

అమ్మోనియా ,నైట్రేట్ , h2s ఇవేవీ కూడా ఉండకూడదు.

చెరువులోని నీటి రంగు ను చూస్తే లేత ఆకుపచ్చ రంగు నుంచి గోధుమ రంగు ఉండాలి

ఇలా చేయడం వల్ల మంచి దిగుబడి తో పాటు రకరకాల వ్యాధుల నుంచి మన చెరువును కాపాడుకోగలం.